Cerita Tentang Kayau Dalam Bahasa Dayak Ngaju

 Artikel Dayak

tropenmuseum - ngayau

Auch Helo Tahiu Manganyau (Dayak Ngaju)

Aton are sababe oloh Dayak mampatei oloh beken atawa hapatei sama arepe. Aton ije mampatei oloh awi kasingie tagal en-en, aton ije mamapatei oloh awi mipen manduan ramoe, sama kilau gawin kare utus beken kea. Tapi aton kea bukue beken tinai. Amon aton oloh haban, aloh inatamba hapan maca-macam tatamba tapi jaton tau barigas tinai, tapi dia kea ampie akan bagulong matei, te bahut oloh misek dengan Sangiang atawa manenong, manggau bukun kahaban te tuntang misek tatambae.

Tinai amon oloh nupi aton taloh manenga karohei tatau akae, te tau kea kanateke taloh balaku dahan olon akan sakie. Te maka saolih-olih ewen manggau jalan mamapatei olon. Kalote mikeh aton bukue beken tinai oloh dayak mamapatei oloh, tapi gawi te uras dia tau inyewut manganyau. Krana manganyau jete dia gawi mampatei oloh, malengkan jete ampin jalan mamapatei oloh tuntang aton tirok gawi te, uka manduan takoloke hapan tiwah.

 

Oloh ije handak hagoet manganyau jete batarang huang hapus lewu basa ewen te dia hagoet brangai atawa suni-suni malengkan aton pesta korik, kuman mihup, mampendeng balai pali, manawur, manajah antang tuntangh kutoh taloh. Ewen hagoet inolak awi kare kolae tuntang oloh bawi.

 

Horan, aloh hong katika pamarentah Blanda ije malawan gawi kasar te, mahin oloh magun tau malaluse manakau matan pamarentah. Jete tau, basa katika helo kare oloh ije aton hong gagenep lewu uras hakola, kalote ewen handiai hayak-hayak manyahokan gawi te. Tinai bara hila huang (huang atei oloh) roch agama Kristen ije mimbit awi Zending ije sasar manang kea hetoh, jala-jalan mampaterai gawi te.

 

Katika toh (1938) tirok manggau takolok olon akan hapan tiwah, tau magun aton batisa hong kare eka korik hong utus dayak, tapin jete baya isut ih, tuntang jaka jete ilalus, te beken toto lagoe bara bihin. Oloh dia bahanyi mawi batarang kilau helo, malengkan ewen hagoet kilau panggoet oloh halisang, kilau oloh hagoet satiar atawa badagang. Tinai amon ewen dumah, te dumah suni-suni, sampai kinjap oloh ije hadarah huma mahin dia katawan aton takolok iimbit buli. Maka jete bahali inyewut manganyau. Awi te amon hong penda ije jari halau huang utus dayak. Are oloh ije belom katika toh, mambatang ewen ije panda bara 40 nyelo umure, jaton kasene kare gawi te, kilau jete horan ilalus awi kare oloh helo.

 

Huang agama kapir ain oloh dayak ije kontep dengan animisme, madue taloh handiai aton ganae, olon, meto, kayu, batu, bukit, petak, tasik, uras aton ganae. Maka gana te tau impahai, impaabas, tau manjadi kuasa paham haream, ie te awi mampalah ije beken, awi mampatei ie. Oloh je jari paham halisang, mahoroi petak, mahoroi tasik, ije jari mite are utus beken, ije jari mandai are bukit gantong, ije jari mampatei are meto korik hai, ie basewut.

 

Tapi basewut haream tuntang tamam toto, marawan oloh handiai dengan oloh ije mampatei olon, manusuh dahan oloh beken. Krana  kuasa ije pangkahai ie te ije aton huang olon, jari impalah awie, jari ie dinon, manjadi kuasa akae. Tumon kakare oloh ije impatei awie, tumon te kea kare kuasa tuntang kaabas hambaruan akae. Awi te ie manjadi basewut, kare kahaie hormat tuntang karawan oloh dengae. Nihau kare katawahe, tapi ie manjadi babehat kotake, bahari totok biwihe. Dia baya oloh bewei marawan ie, tapi kare taloh kea mikeh dengae. Kare sial hadari bara ie, tuntang ie manjadi batuah. Te ie manganyau.

(sumber: Inyurat awi Pandita Ison Birim Tumbang Lahang 15 Nopember 1938, fishing, hunting and headhunting, in the former culture of dayak ngaju in central kalimantan by A.H Klokke)

Author: 

Tabe, Salam Isen Mulang, Adil Katalino Bacuramin Kasaruga Basengat Ka Jubata.

Related Posts

Leave a Reply